बुटवल । श्रीमतीले जबरजस्ती करणीको उजुरी दिएपछि न्यायाधीश भुवन गिरीमाथि पक्राउ पुर्जी जारी भएको छ ।
जिल्ला अदालत कपिलवस्तुले न्यायाधीश गिरीविरुद्ध पक्राउ पुर्जी जारी गरेको हो ।
न्यायाधीश गिरीकी श्रीमतीले जिल्ला प्रहरी कार्यालय कपिलवस्तुमा वैवाहिक जबरजस्ती करणीको उजुरी दिनुभएको थियो ।
जिल्ला प्रहरी कार्यालय कपिलवस्तुले न्यायाधीश गिरीलाई पक्राउ गरी अनुसन्धान गर्न माग गर्दै अदालत समक्ष पक्राउ पुर्जी जारी गर्न माग गरेपछि पक्राउ पुर्जी जारी भएको अदालतका श्रेस्तेदार सुमन पाण्डेले जानकारी दिनुभयो ।
गिरीको हालै कपिलवस्तु जिल्ला अदालतबाट न्याय परिषदमा सरुवा भएको छ । गिरीकी श्रीमतीविरुद्ध पनि सरकारी कागजात किर्तेमा प्रहरीले अनुसन्धान अगाडि बढाएको छ । प्रहरीले गिरीलाई पक्राउ गरेर अनुशन्धान अघि बढाउने तयारी गरेको जानकारी दिएको छ ।
धनकुटा बजारमा बिजुलीकाे नाङ्गो तार हटाइँदै
धनकुटा । धनकुटा बजार क्षेत्रमा विद्युतको नाङ्गो तार हटाउन थालिएको छ । बजार क्षेत्रमा विद्युत् लाइन विस्तारका क्रममा टाँगिएको नाङ्गो तार हटाएर ‘एबीसी केवल’ लगाउन थालिएको हो ।
पहिलो चरणमा धनकुटाको मदनचोकदेखि परिचयमोडसम्मको तार फेर्ने काम भइरहेको नेपाल विद्युत् प्राधिकरण धनकुटाका प्रमुख प्रह्लाद पोखरेलले बताउनु भयाे । धनकुटा नगरपालिका–७ नं. वडा कार्यालय र नेपाल विद्युत् प्राधिकरणको समन्वयमा हुलाकटोल क्षेत्रमा तार फेर्ने काम भइरहेको छ ।
सडक क्षेत्रमानगर प्रहरी खटाएर विद्युत् प्राधिकरणका कर्मचारीले तार फेर्ने काम गरिरहेका छन् । अब विद्युत् प्राधिकरणसँगको समन्वयमा क्रमिक रुपमा बजार क्षेत्रका सबै नाङ्गो तारहरु हटाइने धनकुटा नगरपालिकाका मेयर चिन्तन तामाङ बताउनु भयाे ।
‘नाङ्गो तारमा करेन्ट लाग्ने जोखिम हुन्छ । बजार क्षेत्रमा हेर्दा पनि धेरैवटा तार गज्याङगुजुङ नराम्रो देखिने हुनाले एउटै लठ्ठा भएको एबीसी तार लगाउन थालिएको हो ।’ उहाँले भन्नुभयाे ‘पहिलो चरणमा हुलाकटोल क्षेत्रमा तार फेरिँदैछ । त्यसपछि विद्युत् प्राधिकरणसँग समन्वय गरेर क्रमिक रुपमा बजार क्षेत्रका सबै क्षेत्रमा नाङ्गो तार हटाउँछौँ।’
