काठमाडौं । राष्ट्रपति विद्यादेवी भण्डारीले सरकार गठनका लागि आह्वान गरिसकेका छन् । सँगै दलहरूले तयारी थालेका छन् ।
सरकार गठनको प्रकृया प्रारम्भ भएसँगै सत्तारुढ गठबन्धनबीच पद बाँडफाँडको छलफल पनि सुरु भएको छ । औपचारिक अनौपचारिक रुपमा दलहरूले दावी प्रस्तुत गरिरहेका छन् ।
नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री दाबी गरेका छन् भने गठबन्धनको तेस्रो ठूलो दल नेकपा एकीकृत समाजवादीले राष्ट्रपति दाबी गरेको छ ।
एकीकृत समाजवादीको आइतबार सम्पन्न सचिवालय बैठकमा गठबन्धनबीच ‘पावर सेयरिङ’ हुँदा राष्ट्रपति बटमलाइन बनाउने विषयमा छलफल भएको छ । सचिवालय बैठकमा राष्ट्रपतिमा बलियो दाबी गर्ने विषयमा सबै नेता एकमत देखिए ।
राष्ट्रपति दाबी गर्ने निष्कर्षमा पुगेको एकीकृत समाजवादीले प्रधानमन्त्री भने दाबी नगर्ने भएको छ । ठूलो दलको हैसियतका आधारमा कांग्रेस र माओवादीलाई प्रधानमन्त्री पद छोड्ने सचिवालय बैठकको निष्कर्ष रहेको छ ।
अध्यक्ष नेपालले बैठकलाई ब्रिफिङ गर्दै गठबन्धनबीच राष्ट्रपति, उपराष्ट्रपति, प्रधानमन्त्री, सभामुख र उपसभामुखमा प्याकेजमा सहमति गर्न लागेको बताएका थिए ।
राष्ट्रपति पदलाई बटमलाइन बनाउने निष्कर्षमा पुगेको एकीकृत समाजवादीले कसलाई राष्ट्रपतिको उम्मेदवार बनाउने भन्ने निर्णय गरिसकेको छैन । तर, औपचारिक अनौपचारिक रुपमा सम्मानित नेता झलनाथ खनालको नाम राष्ट्रपतिका लागि चर्चामा रहेको छ ।
एकीकृत समाजवादीले राष्ट्रपति पदलाई बटमलाइन बनाए पनि गठबन्धनबीच भागबन्डा हुँदा सभामुख पाउने अनुमान हुने गरेको छ ।
