काठमाडौं । राष्ट्रपति रामचन्द्र पौडेलले पद तथा गोपनियताको शपथ लिनुभएको छ । पौडेलले सोमबार दिउँसो राष्ट्रपति भवनमा आयोजित विशेष समारोहमा शपथ लिनुभएको हो ।
राष्ट्रपति पौडेललाई कायम मुकायम प्रधानन्यायधिश हरिकृष्ण कार्कीले शपथ गराउनुभयो । गत फागुन २५ गते भएको निर्वाचनमा पौडेल ३३ हजार ८०२ मतभार ल्याएर मुलुकको तेस्रो राष्ट्रपति बन्नुभएको हो ।
शपथपछि निवर्तमान राष्ट्रपति विद्यादेवी भण्डारीले आफ्नो कुर्सी राष्ट्रपति रामचन्द्र पौडेललाई हस्तान्तरण गर्नुभयो ।
प्रधानमन्त्री पुष्पकमल दाहाल प्रचण्डले निवर्तमान राष्ट्रपति भण्डारीलाई सरकारका तर्फबाट उपहार प्रदान गर्नुभएको छ ।
यसबीच निवर्तमान राष्ट्रपति भण्डारी लगातार दुई कार्यकाल पूरा गरी शीतल निवासबाट विदा हुनु भएको छ । राष्ट्रपति पौडेलले गाडीसम्मै पुगेर भण्डारीलाई विदाइ गर्नुभयो ।
